Gjakovë- Janë përkujtuar të merkurën në Rogovë të Hasit 21 dëshmorët dhe 9 martirët e rënë me 27, 28 dhe 29 janar në fshatrat Bishtazhin, Goden dhe Rogovë.

Ceremonia e përkujtimit të këtyre të rënëve sivjet është organizuar nën përkujdesjen e komunës së Gjakovës, ndërsa homazhe në varrezat e dëshmorëve dhe tek lapidari në fshatin Rogovë ka bërë edhe kryetarja e komunës Mimoza Kusari – Lila.

“Ditët si kjo e sotmja na kthejnë pas duke na kujtuar veprat e lavdishme të bijve dhe bijave tona të cilët për idealin kombëtar dhanë më të shtrenjten, jetën e tyre. Janari i vitit 99, Rogovën e bëri heroike me verprën e dëshmorëve dhe martirëve. Edhe pse 15 vjet plot dhembje dhe krenari, kujtesë dhe lavdi, ne sot sëbashku kujtojmë dhe refkeltojmë nga vepra e tyre e madhe. Epopeja e janarit, një ndër ngjarjet më të rëndësishme për qytetarët e Rogovës dhe tërë Kosovës, me vete sjellë trimërinë, sakrificën, vendsomërinë dhe guximin për të treguar se ky vend gjithmonë kishte, ka dhe do të ketë trima dhe trimëresha të gatshëm për të dhënë çdo gjë të mundshme për lirinë, për zhvillimin dhe përspektivën e Kosovës”, ka thënë në fjalen e saj kryetarja e Komunes Kusari – Lila.

Në këtë aktivitet përkujtimor, ka marrë pjesë edhe ish – komandanti i Zonës Operative të Dukagjinit Ramush Haradinaj, i cili ka thënë se vepra sublime e këtyre të rënëve nuk harrohet tash pas 15 vjete e nuk do të harrohet asnjë herë për breza të tërë.