Gjakovë- Në Ngrohtoren e qytetit në Gjakovë, janë duke u bërë përpjekje të vazhdueshme në mënyrë që shfrytëzuesve të saj t`ju sigurohet një vazhdimësi e ngrohjes.

Si jemi informuar nga Simon Deda, ushtrues i detyrës së drejtorit në Ngrohtoren e Qytetit në Gjakovë, përmes donacioneve nga Ministria e Zhvillimit Ekonomik, tashmë është arritur të sigurohet një donacion për sigurimin e lëndës së parë mazutit.

Sipas Dedës, për t`ju shmangur ndërprerjes së furnizimit me mazut, gjatë ditës së enjte do të paguhen të gjitha borxhet e mbetura ndaj furnitorit, borxhe këto të cilat janë të precizuara edhe në kontratë. Deda për Radio Gjakovën ka thënë se pas përmbushjes së obligimeve ndaj furnitorit, përkatësisht pagesës së borxheve, do t’i dihet saktë se sa do të jenë mjetet në dispozicion për sigurimin e mazutit për ditët në vazhdim.

Në anën tjetër, drejtori i Drejtorisë komunale për Shërbime Publike, Etor Hoxha, ka thënë se komuna do të ketë një impenjim serioz, në mënyrë që shfrytëzuesve t`ju sigurohet një ngrohje konstante deri në fillim të muajit mars./radiogjakova/