Përfaqësues të Bankës Evropiane për Rindërtim dhe Zhvillim së bashku me përfaqësues të ministrisë së Infrastrukturës, kanë qëndruar dje në Gjakovë. Qëllimi i visitës ka qenë njoftimi me planet dhe projektet e komunës për zgjerimin e rrugëve në drejtim të Pejës dhe Prizrenit.

Sipas Mustafë Krasniqit, këshillëtar i ministrit të Infrastrukturës Lutfi Zharku, kjo ministri ka kërkuar ndihmë financiare tek Berzhi për realizimin e disa projekteve, në mesin e të cilave edhe zgjerimin e rrugës Pejë–Gjakovë–Prizren.

Sipas tij, përfaqësuesit e BERZH-it tashmë kanë ardhur në Kosovë për të parë nga afër mundësitë e investimit në këto projekte. E gjatë këtij takimi, mysafirët janë njoftuar nga zyrtarët komunal se komuna e Gjakovës i ka të gatshme projektet të cilat i kanë prezentuar para tyre

Projektet për unazen e madhe të qytetit, që lidh daljet e qytetit nga drejtimi i Pejës dhe Prizrenit, ku përfshihet edhe dalja në drejtim të Prishtinës. Sipas projektit, traseja e re devijohet nga fshati Osek Pashë, përskaj aeroportit të Gjakovës e deri në fshatin Qerim, ku lidhet me magjistralen Gjakovë–Klinë.

Nga kjo pikë, traseja kalon nëpër rrugën ekzistuese deri tek lokacioni “Pika e Zezë”, për të devijuar majtas paralel me rrugën “Tirana”, deri në afërsi të urës së Nakarades, në magjistralen Gjakovë–Prizren. Eksperët e BERZH-it janë shprehur mjaft të kënaqur duke shtuar se projektet e gatshme të komunës do të jenë lehtësim për realimin e tyre.