Të martën nisi vlerësimi ndërkombëtar PISA 2018 në Gjakovë. Ministria e Arsimit ka përzgjedhur në mënyrë të rastësishme 250 nxënës gjakovarë nga 8 shkolla të ndryshme, 4 prej të cilave janë të mesme të ulëta dhe 4 të tjera të mesme.

Përmes pyetjeve të këtij testi, vlerësohen shkathtësitë dhe njohuritë e nxënësve në fushën e gjuhës, matematikës dhe shkencës, por për këtë vit fokus më i madh është në fushën e gjuhës.

Për shkak të kushteve, ky vlerësim në Gjakovë po mbahet në shkollën “Zekeria Rexha”. Në ditën e parë këtij testimi iu nënshtruan nxënësit e kësaj shkolle, ndërsa të martën ata të shkollës së mesme “Nexhmedin Nixha”.

Koordinatorja e Testit PISA në Gjakovë, Afijete Efendija, deklaroi se gjithçka po ecën mirë me procesin e vlerësimit.

“Dita e parë ka qenë shumë mirë, po ashtu edhe e dyta. Jemi në kontakte të vazhdueshme me Ministrinë e Arsimit. Uroj që gjithçka të përfundojë siç ka nisur”, deklaroi ajo. 

Një pjesë të barrës së organizimit të këtij testi e mban edhe shkolla “Zekeria Rexha”. Drejtori Pleurat Rudi tha se përpos disa problemeve teknike që janë zgjidhur menjëherë nuk ka pasur asnjë problem tjetër gjatë dy ditëve të para të këtij testimi.

“testi mbahet ë mënyrë elektronike dhe kompjuterët janë vendosur me kohë. Programet janë instaluar 5 ditë para ditës së para dhe janë testuar paraprakisht. Në ditën e parë ka pasur një problem teknik me 3 kompjuterë që është zgjidhur menjëherë. Kemi edhe administrues nga Prishtina që op e mbikëqyrin të gjithë procesin”, u shpreh Rudi.

Përpos nxënësve 15-vjeçarë të shkollës “Zekeria Rexha” dhe “Nexhmedin Nixha”, gjatë ditëve të ardhshme këtij testimi do t’i nënshtrohen edhe ata të shkollave “Hajdar Dushi”, “Kadri Kusari”, “Hysni Zajmi”, “Selman Riza”, “Haxhi Hoti” dhe “Dëshmorët e Hereçit”.

Ndërsa, Drejtoria e Arsimit në Gjakove pret rezultate më të mira se sa ato të 3 viteve më parë./radiogjakova/