Vdekja e 22-vjeçarit Art Kurti që tronditi Gjakovën po hetohet nga policia si “vrasje e dyshimtë” apo si vetëvrasje.

Nëse pretendimet e policisë dhe prokurorisë vërtetohen pas konstatimit të raportit mjeko-ligjor dhe provave të tjera, atëherë kjo do të ishte vetëvrasja e pestë për 4 muajt e parë të këtij viti në Gjakovë.

Më 17 janar të këtij viti, K. M. 45-vjeçar nga fshati Dol i dha fund jetës dhe u gjet pranë varrit të të atit i cili kishte ndërruar jetë vite më parë. I ndjeri ishte i martuar dha la pas vetes 3 fëmijë, më i madhi 15-vjeç.

Po në muajin Janar, një 82-vjeçar u hodh nga Ura në Bllokun e Ri duke i dhënë fund jetës. Trupi i tij u gjet javë më pas.

Po ashtu, më 9 mars të këtij viti në rrugën “Bajram Curri” një person i moshës 45-vjeçare, sipas policisë, dyshohet se është vetëvrarë.

Para dy ditësh, një 41-vjeçar me iniciale F.S. ishte zhdukur për dy ditë, por më pas u gjet i vdekur në katin e shtëpisë ku jetonte. Dyshohet se u vetëvra me një kabllo elektrike./radiogjakova/