Gjakovë- Ka filluar festivali treditor i koreve “Accapello”, në të cilin për 3 netë me radhë do të performojnë kore nga qytete të ndryshme të Kosovës dhe ato të Bullgarisë. Në natën e parë ka performuar Kori i Shkollës së Muzikës “Prenk Jakova” nga Gjakovë, me dirigjente Klodina Kryeziu si dhe Kori i Femrave “Nerzadelni” nga qyteti bullgar Kyustendil me dirigjente Vesela Petrova.

Performaca e të dy koreve u përcoll me vëmendje të madhe nga publiku, në mesin e të cilëve kishte edhe shumë emra të njohur të muzikës. Mysafir në natën e parë ishte edhe ambasadori i Bullgarisë në Kosovë Bobi Bobev, i cili e vlerësoi lartë këtë bashkëpunim, ndërsa premtoi se do të angazhohet që ky festival të bëhet tradicional dhe të zgjerohet edhe me pjesëmarrjen e koreve nga vende tjera të Ballkanit.

Të enjten (sonte) në natën e dytë të festivalit do të përformojnë Kori i Femrave “Vox Art” nga Prishtina, me dirigjent Dirigjent Ylber Asllanaj dhe Kori Mix nga Ferizaji, me dirigjente Lindita Isufin. Festivali është vlerësuar edhe nga drejtori i tij Rauf Dhomi, i cili ka thënë se dëgjuesit do të kenë mundësi të përjetojnë interpretime cilësore nga koret pjesëmarrëse./radiogjakova/