Në ambientet e Shkollës Fillore “Zekeria Rexha” në Gjakovë u mbajt testi i maturës shtetërore, afati i dytë.

Si jemi njoftuar nga Afijete Efendia, koordinatore rajonale nga Drejtoria komunale e Arsimit në Gjakovë, testit të maturës në këtë afat i janë nënshtruar gjithsejt 140 nxënës, nga 200 të tillë, sa ishte numri i tërësishëm i nxënësve të cilët nuk e kishin përfunduar me sukses testin e maturës në afatin e parë.

Sipas koordinatores Efendia, në nismë të këtij testi janë bërë të gjitha përgatitjet e nevojshme, ndërsa administruesit e këtij testi janë nga komunat e Malishevës dhe Rahovecit të cilët kujdesen për të parandaluar parregullsitë e mundshme.

Testi është ndarë në dy pjesë, ndërkohë që të premten, maturantët iu nënshtruan testit i cili ka 120 pyetje nga lëndët Gjuhë Shqipe, Matematikë dhe gjuhë angleze.

Në anën tjetër pjesa e dytë e këtij testi, i cili përmban 80 pyetje, sipas drejtimeve përkatëse do të mbahet me 30 gusht, ndërkohë që shpallja e rezultateve të përgjithshme do të bëhet më 7 shtator./radiogjakova/