Zyra Rajonale e Aleancës Kosovare të Bizneseve në Gjakovë ka reaguar ndaj operatorit të shpërndarjes së energjisë KEDS, pasi sipas tyre, po dëmton bizneset kosovare që merren me prodhimin dhe montimin e materiale elektrike.

Saktësisht, AKB pretendon se KEDS blen materiale elektrike tek kompanitë turke dhe serbe, edhe pse të njëjtat prodhohen e shiten edhe në Kosovë. Kjo, për AKB-në, po rrezikon mbylljen e 53 bizneseve në tërë Kosovën.

Për kreun e Aleancës Kosovare të bizneseve në Gjakovë, Argjend Fetahu, është e papranueshme heshtja e Qeverisë dhe Zyrës së Rregullatorit për Energji.

“Me këtë lloj monopoli rrezikojnë të mbyllen 53 biznese të Kosovës që janë prodhuese dhe montuese të materialeve elektrike si dhe largimi i mijëra punëtorëve nga puna dhe rrjedhimisht humbje të miliona eurove”, deklaroi Fetahu.

Ai shton se kompanitë vendore prodhojnë materiale elektrike me standarde evropiane, ndërsa kushtet që vë KEDS-i janë të papranueshme.

“Materiale elektrike si për shembull: transformatorë distributivë, kthina të tensionit të mesëm, blinda, shtëpiza metalike, etj., KEDS nuk i pranon të jenë prodhim vendor kur bëjnë pranimin teknik të objekteve të mëdha afariste apo banesore, edhe pse me standarde evropiane, por i kërkon të jenë të kompanisë që i dëshiron vetë. Plus kësaj, kjo kompania nuk i përshtatet kërkesave të klientit, sikurse kompanitë vendore, duke i detyruar të blejnë më shumë se ç’është e nevojshme”, u shpreh Fetahu.

Ai shtoi se i kanë dërguar letër Presidentit Thaçi, kryeministrit Haradinaj, kryekuvendarit Veseli, kryeprokurorit Lumezi dhe ministrave Reshitaj, Lluka, Hasi dhe kreut të ZRRE, Pepaj në mënyrë që të reagojnë dhe t’u dalin në ndihmë kompanive vendore.

Kryetari i Zyrës Rajonale të Aleancës Kosovare të Bizneseve në Gjakovë, Argjend Fetahu, paralajmëroi edhe mundësinë e protestave në rast se kërkesat e tyre nuk merren parasysh./radiogjakova/