Shumë biznese në komunën e Gjakovës vazhdojnë të operojnë në mënyrë ilegale, për faktin se ato nuk e kanë të regjistruar aktivitetin e tyre biznesor në komunë. Kjo dukuri po sjellë shumë të këqija për Gjakovën, duke filluar nga krijimi i kushteve të pabarabarta të të bërit biznes, dëmtimi i bizneseve të rregullta dhe dëmtimi financiar i buxhetit komunal, në një kohë kur secili cent është i mirëseardhur për investime komunale.

E që kjo dukuri të marrë fund sa më shpejtë, komuna e Gjakovës po planifikon një aksion të gjerë për identifikimin dhe detyrimin për regjistrim, ose në të kundërtën ndëshkimin e këtyre bizneseve, deri tek mbyllja e përhershme e tyre.

Një aksion i tillë pritet të fillojë nga Çarshia e vjetër, në dhjetëra lokale hoteliere në këtë pjesë, shumica e të cilëve dihet fare mirë që operojnë pa leje dhe pa biznes të regjistruar. Ani pse pronarët e këtyre lokaleve janë ankuar për mungesë të qarkullimit, zyrtarët komunal kanë thënë se pas një tolerimi mbi një vjeçar, me qëllim të ndihmës, tashmë ka ardhur koha që edhe ato biznese të regjistrohen dhe të jenë të barabarta në treg me të gjitha bizneset tjera./radiogjakova/