Oficerët doganor kanë konfiskuar 14 aparate për lojëra të fatit, në Gjakovë, pas një lajmërimi nga ana e qytetarëve. Dogana e Kosovës përmes një komunikate njofton se pas pranimit të informatave se në qytetin e Gjakovës ka pika të pa-licensuara të lojërave të fatit, të cilat hapen vetëm në orët e vona, sektorët kompetent të Doganës se Kosovës kanë ndërmarrë veprimet për verifikimin dhe vërtetësinë e këtyre informatave.

Pas identifikimit të lokacioneve është organizuar një aksion ku kanë marr pjesë Dogana Policia dhe Administrata Tatimore. Pas bastisjeve dhe kontrolleve të ushtruara në 4 lokacione janë gjetur parregullsi në mungesën e dokumentacionit, si mungesa e regjistrimit për zhvillimin të aktivitetit biznesor, aparate të pa-licensuara, aparate pa numër serik dhe pa dokumentacion përcjellës. Me këtë rast janë konfiskuar 14 aparate për lojëra të fatit, lokalet janë mbyllur si dhe lëndët kanë kaluar në kundërvajtje doganore.