Kanë kaluar 6 vite që kur Komuna e Gjakovës miratoi planin rregullativ për ndërtimin e kampusit universitar, mirëpo që nga ajo kohë përveç rrethimit dhe pastrimit sipërfaqësor të hapësirës afër Urës së Tabakut, nuk ka pasur ndonjë zhvillim tjetër.

Rektor i Universitetit “Fehmi Agani” në Gjakovë, Shaban Buza, tha se shuma që është ndarë për tri vitet e ardhshme është e pamjaftueshme për finalizimin e këtij kompleksi si projekti më madhor për arsimin në komunën e Gjakovës.

Universiteti është në konsultime me organet lokale dhe qendrore, për të parë mënyrën e mbështetjes më të madhe për të nisur punët në ndërtimin e kompleksit universitar.

“Ka pasur dy tenderë deri më tani, një ëpr pastrimin sipërfaqësor dhe një për planin e detajuar të kampusit. Kemi informata se do të kemi ndihmën e Qeverisë qendrore dhe lokale për ndërtimin e kampusit sepse me mjetet e ndara për tri vitet e ardhshme na rezulton edhe nga vlerësimi i ekspertëve se nuk mjafton”, tha Buza.

Kompleksi universitar do të ndërtohet në ish-kazermën e ushtrisë, afër Kishës Katolike, në një hapësirë prej 16 hektarë, i cili përmbush të gjitha normativat evropiane që kërkohen për këto lloje kampusesh.

Brenda tij është paraparë ndërtimi i objekteve për tri fakultete, atë të Edukimit, Filologjik dhe Mjekësisë, laboratorët, rektorati, palestra e sporteve, mensa, konvikti dhe biblioteka.

Kryeministri aktual Ramush Haradinaj gjatë fushatës për zgjedhjet e përgjithshme kishte premtuar se do të jetësojë këtë kompleks. Këtë premtim ai e përsëriti edhe këtë vit gjatë vizitës që i bëri Gjakovës./radiogjakova/