Gjakova është qyteti i tretë me numrin me të lartë të personave që kërkojnë lëmoshë në Kosovë. Policia njoftoi se gjatë vitit 2017 në Gjakovë janë regjistruar 21 lypsarë, ndërsa më shumë ka pasur vetëm në Prishtinë e Gjilan.

Kur krahasohen këto statistika me ato të vitit 2016, shohim se ka pasur rënie të personave që kërkojnë lëmoshë. Sipas këtyre statistikave numri më i madh i personave që kërkojnë lëmosh i takojnë komunitetit rom.

Ajo që mbetet shqetësuese është fakti se një numër i konsiderueshëm i lypsarëve janë fëmijë.

Policia e Kosovës thotë se në vazhdimësi ka ndërmarrë veprime ligjore si me plane operative ashtu dhe me projekte që të largojë lypsarët nga rruga.

Sipas tyre, këto veprime janë ndërmarrë në bashkëpunim me Qendrën për Punë Sociale dhe me partnerë të tjerë bashkëpunues./radiogjakova/