Gjakovë- Drejtoria komunale për Kadastër dhe Gjeodezi në Gjakovë, ka vendosur që të kthejë në gjendjen e mëhershme pronën kontestuese të ndërmarrjes “Tregtia”, pronë e cila ishte blerë nga kjo organizatë në vitin 1978, por ishte marrë nga komuna në vitin 2011 me pretendimin se i njëjti lokal është pronë komunale.

Kthimin e këtij lokali në gjendjen e mëhershme e ka konfirmuar edhe drejtori i ri i Kadastrës në Gjakovë, Skender Tullumi. Ai ka thënë se zyrtarët e ndërmarrjes “Tregtia” kanë prezantuar dokumente të cilat e dëshmojnë fuqishëm të drejtën e pronësisë, prandaj edhe e kanë marrë vendimin për kthimin e kësaj prone. Ky vendim e ka gëzuar tej mase drejtorin e ndërmarrjes “Tregtia” Ahmet Keraxhija, i cili ka thënë se pas disa vjet “lufte” mes tij edhe ish qeverisjes komunale, drejtësia në fund ka triumfuar në këtë rast.

Ndërkohë, lidhur me rastet tjera të përfolura për bartje joligjore të pronës nga ndërmarrjet publike tek komuna e Gjakovës, drejtori i Kadastrit të Gjakovës Skender Tullumi ka bërë me dije se do të shqyrtohet secili rast apo secila pronë për të cilën dërgohen dëshmi e fakte se diçka aty nuk është në rregull./radiogjakova/