Brigada e Zjarrfikësve në komunën e Gjakovës është bërë me një kamion modern për fikjen e zjarrit.

Kjo makinë tejet e nevojshme për zjarrfikësit gjakovarë ka ardhur si donacion nga zjarrfikësit e qytetit Limburg të Holandës, ndërsa ndërmjetësues i këtij donacioni është ish-polici holandez i EULEX-it Wim Beeren i cili vite më parë ka shërbyer në komunën e Gjakovës.

Në ceremoninë e pranim-dorëzimit të këtij automjeti që u bë të enjten në ambientet e Brigadës së Zjarrfikëseve, ka marrë pjesë edhe nënkryetari i komunës së Gjakovës Armend Vokshi si dhe ambasadorja e Holandës në Kosovës, Gerrie Willems, të cilët e vlerësuan lartë kontributin që zjarrfikësit holandezë, por edhe ish-polici Wim Beeren dhe kolegët e tij e kanë dhënë për sigurimin dhe transportimin e këtij mjeti.

Nënkryetari Vokshi ka uruar që ky mjet t’ju shërbejë në maksimum zjarrfikësve gjakovarë, ndërsa në shenjë falënderimi ka ndarë mirënjohje për ish-policin Wim Beeren dhe pesë kolegët e tij që kanë ardhur në Gjakovë dhe e sollën zjarrfikësen.