Gjakovë- Nën patronatin e kryetares së komunës, Mimoza Kusari Lila, është mbajtur akademia përkujtimore në nderim të të rënëve Fatmir Kërleshi dhe Xhevat Hoxha, të cilët para 24 viteve ishin vrarë në protestën e organzuar në lagjen “Gecë”.

Para pjesëmarrësve në akademi fjalë ka mbajtur kryetarja Kusari Lila, e cila tha se dritat e para të rilindjes së fundit u ndezën në lagjen “Gecë” fillimisht me guximin e dëshmorit Nesemi Dervishdana, e më pas me trimërinë e Fatmir Kërleshit dhe Xhevat Hoxhës.

“Sot më kujtohet vendosmëria e 100 mijë pjesëmarrësve në ditën e pavdekësisë së Xhevatit dhe Fatmirit. Më kujtohet krenaria e nënave dhe familjarëve të tyre. Më kujtohen brohoritjet për liri dhe shtet dhe të gjitha këto për mua, për ju dhe për të tjerët janë një thirrje më shumë që idealin e të rënëve ta plotësojmë me zhvillim, mirëqenie dhe punë”, tha Kusari-Lila.

Ajo shtoi se demonstratat e vitit 1990 ishin një shteg lavdie për të gjithë protestuesit “të cilët aq spontanisht përshkruan rrugën e historisë duke parakaluar para shtatores së Sulejman Vokshit, lapidarit të Lidhjes së Prizrenit, shtatores së Bajram Currit, duke dëshmuar kështu në heshtje se kush është Gjakova”.

Ndërkaq, në akademi kanë folur edhe prof. Ruzhdi Sefa,  i cili ka kujtuar rrethanat e rënda të asokohshme për Kosovën dhe karakterin e demonstratave, si dhe Bekim Bardhi, demonstrues i plagosur i asaj mbrëmje. Në emër të familjeve të të rënëve për organizimin e kësaj akademie përkujtimore ka falënderuar Ferhat Kërleshi, vëllau i Fatmirit./radiogjakova/