Të hënën, Gjakova kujtoi viktimat e egërsisë së shfrenuar të forcave serbo-malazeze së masakrës që ndodhi mes datës 1 e 2 prill 1999 në bashkësinë e parë lokale ku u vranë e u dogjën për së gjalli mbi 60 burra, gra e fëmijë të kësaj lagje.

Ato dy net të llahtarshme , 20 anëtarë të familjeve Vejsa, Hoxha, Haxhiavdija, Caka, Gashi dhe Nuçi të strehuar në shtëpinë e Lulzim Vejses u ngjitën në qiell bashkë me flakën që dogji trupat e tyre për ta sjellë dritën e lirisë mbi trojet tona.

Po ashtu, u vranë dhe u dogjën bashkë me shtëpitë edhe të katër anëtarët e familjes Cana, katër nga familja Gërçari, pastaj te familjeve Dulatahu, Qarkaxhija, Bardoniqi, Haxhija, Guci, Tetrica, Demjaha e shumë të tjerë.

Në 19-vjetorin e flijimit të tyre për liri, politika në Gjakovë nderoi viktimat e masakrës së 1 dhe 2 prillit të vitit 1999. Kryetari Ardian Gjini kryesoi një delegacion nga Komuna e Gjakovës në homazhet e organizuara nga Këshilli i Bashkësisë së Parë Lokale.

Gjini premtoi se do të ndërtojë një memorial që Gjakova të mos harrojë asnjëherë çfarë ato dy net të llahtarshme në këtë zonë.

Homazhe bënë edhe përfaqësues të partisë Alternativa me kryetaren dhe deputeten Mimoza Kusari-Lila. Ish-kryetarja e Gjakovës deklaroi se të tilla data na kujtojnë se sa shtrenjtë e kemi paguar lirinë që e gëzojmë sot dhe na obligojnë të punojmë më shumë për vendin.

Po ashtu, homazhe kanë bërë edhe Lëvizja Vetëvendosje dhe qytetarë e familjarë të viktimave./radiogjakova/