Mbishkrimet në muret e objekteve publike dhe private po shëmtojnë qytetin e Gjakovës.

Kjo për faktin se në shumicën prej tyre përdoret një gjuhë ofenduese, por sheh edhe shenja të ndaluara që i përkasin regjimeve më të egra si shenja e nazistëve dhe të tjera.

Disa pronarë shtëpish private ankohen se muret rrethuese të shtëpive të tyre bëhen cak i këtyre mbishkrimeve që përmbajnë fjalë të turpshme.

Megjithëse nuk ka pasur ndonjë aksion për pastrimin e tyre nga ana e Komunës, një gjë e tillë kërkohet nga qytetarët që thonë se ndihen në siklet kur kalojnë me familjarë pranë këtyre grafiteve që kanë edhe gjuhë diskriminuese.

Nga këto mbishkrime nuk kanë shpëtuar as disa prej shtatoreve e busteve në Gjakovë apo edhe shenja të komunikacionit.

Në anën tjetër në disa lokacione, Komuna ka lejuar disa murale që i japin një pamje tjetër atraktive hapësirës ku janë, por edhe përcjellin  mesazhe pozitive për qytetarët./radiogjakova/