Gjakovë- Këto ditë doli nga shtypi libri “101 Personalitete – Fetare, Atdhetare, Kulturore dhe Letrare”, i studiuesit dhe hulumtuesit Mexhid Yvejsi, i cili është botuar nga Instituti për Shkencat Humane ‘Ibni Sina’.

Në këtë libër janë evidentuar 101 personalitete fetare, atdhetare, kulturore e letrare nga të gjitha trojet shqiptare, të cilët kanë shërbyer në ruajtjen dhe përhapjen e vlerave shpirtërore dhe intelektuale në shoqërinë mbarë shqiptare. “Kultura është një mënyrë, përmes së cilës njerëzit lidhen, njihen, afrohen dhe kuptohen, falë komunikimit ndërmjet tyre.

Qëllimi i kulturës është gjithashtu, që ajo t’i japë një kuptim jetës. Por, jeta pa besim s’ka kuptim”, shkruan Mexhid Yvejsi në hyrje të këtij libri. Me botimin e këtij libri, Instituti “Ibni Sina” synon të hedhë dritë mbi figurat intelektuale shqiptare, të cilat më pak janë njohur nga lexuesi i sotëm dhe në këtë mënyrë të hidhet një hapë drejt zgjerimit të studimeve më të hollësishme rreth këtyre figurave shqiptare.

Ky libër gjithashtu zbardhë trashëgiminë tonë shpirtërore dhe intelektuale dhe është udhërrëfyes për studime të mëtutjeshme./radiogjakova/