Shëndetësia kosovare humbi njërin prej mjekëve më të mirë në fushën gjinekologjisë, dr. Behar Kusari, i cili ndërroi jetë ditën e enjte pas një sulmi në tru. Me këtë rast, në Pallatin e Kulturës “Asim Vokshi” u mbajt një takim përkujtues për veprën e tij.

Në emër të Komunës së Gjakovës, ngushëllimet familjes i përcolli nënkryetari Armend Vokshi, i cili tha se humbja e dr. Kusarit nuk është humbje vetëm për shëndetësinë, por për të gjithë shoqërinë kosovare.

“Dr. Behari padyshim që ishte një nga profesionistët më të mirë që detyrën e tij e kreu në mënyrën më të përkushtuar të mundshme duke u bërë model dhe udhërrëfyes për të gjithë mjekët e rinj. Gjithmonë shpërndau mirësi e buzëqeshje duke u bërë njeriu më i dashur për shumë njerëz. Ikja e parakohshme e Dr. Beharit nga kjo botë është një humbje shumë e madhe për tërë shoqërinë tonë pasi humbëm një kontributdhënës të çmuar”, u shpreh Vokshi.

Dr. Myrvete Paçarada nga Qendra Klinike Universitare e Kosovës, u shpreh se kontributi i të ndjerit Kusari do të mbetet i paharruar.

“Për tërë këto vite, ai dha shumë për pacientët duke u kujdesur për ta deri në momentet e fundit. Ndërsa do të mbetet i paharruar edhe kontributi i tij në momentet më të ëvshtira në të cilat kaloi vendi ynë. Ishte profesionist, bujar e human e këtë e tregoi me veprimet e tij konkrete”, u shpreh doktoreshë Paçarada.

Vlerësime për punën e suksesshme të Dr. Behar Kusarit dha edhe Dr. Mentor Rruka.

“Në aspektin profesional , me gjithë angazhimin e tij, ai arriti që të kalojë të gjitha barrierat dhe të na prezantojë denjësisht, për çka neve si gjeneratë na ka bërë shumë krenar. Por, ja që në momentin kur angazhimi i tij profesional preku kulmin erdhi edhe momenti i kobshëm i ndarjes nga jeta”, u shpreh Rruka.

Në emër të familjes Kusari, të pranishmit i falënderoi i biri i të ndjerit, Vullneti, që u shpreh se ndjehen të obliguar të vazhdojnë misionin fisnik të të atit.

“Puna e tij ne si familjarë na ka bërë krenarë, ndërsa juve ju ka mbushur shtëpitë me zërin e gëzueshëm të fëmijëve. Do të na mungojë shumë të gjithëve, por prezenca juaj na lehtëson dhe na jep forcën e na obligon që msionin e tij fisnik ta vazhdojmë me shumë përkushtim”, u shpreh Vullnet Kusari.

Pas ceremonisë, zyrtarë të lartë komunal, deputetë, përfaqësues të partive politike dhe organizatave të ndryshme, miq e kolegë dhe qytetarë bënë homazhe pranë trupit të pajetë në hollin e Pallatit e të Kulturës.

I ndjeri Behar Kusari diplomoi në Fakultetin e Mjekësisë në Universitetin e Prishtinës, më pas specializoi në Nish në drejtimin gjinekologji-obstretik. Ai vijoi edhe trajnimet e plota në Universitetin e Brukselit në Belgjikë dhe Akademinë e Holandës. Ishte anëtar dhe bashkëpuntor i shumë organizatave të njohura të mjekësisë në botë./radiogjakova/