Nxënësit e shkollave “Këlmend Rizvanolli”, “Mazllum Këpuska”, “Fehmi Agani”, “Barjam Sadriu” në Berjahë dhe “Anton Çetta” në Dol, që janë njëkohësisht pjesë e Komunitetit të të mësuarit së bashku “Ylli” në mënyrë të organizuar kanë dhuruar pako ushqimore për familjet në nevojë që do të shpërndahen nga Kryqi i Kuq.

Ky aktivitet u organizua në Muajin e Solidaritetit, ndërsa si iniciativë ka qenë shumë e mirëpritur nga organizata e Kryqit të Kuq.

Drejtoresha e shkollës “Këlmend Rizvanolli”, Valma Kamishi Zeka falënderoi nxënësit dhe familjet që iu përgjigjen ftesës për të gëzuar mijëra familje në nevojë.

“Jemi befasuar për të mirë për ndihmat që i sollën nxënësit. Ne vendosëm që kësaj radhe të dhurojmë pako ushqimore, pra ka pasur oriz, miell, vaj, makarona, krip, pure, fasule, etj., prandaj i jam shumë falënderues nxënësve dhe familjeve”, tha Zeka.

Edhe drejtori i shkollës “Mazllum Këpuska”, Arbënor Pozhegu është i kënaqur me organizimin e nxënësve të tij për të ndihmuar familjet në nevojë. Ai tha se ky nuk është aktiviteti i vetëm me këtë qëllim.

“Nxënësit e shkollës sonë ditë më parë organizuan një aktivitet me ushqime të konservuara ku të gjitha ato më pas iu dhuruan Kryqit të Kuq. Tani bëhen disa vite që ne dhurojmë, por këtë vit kemi qenë të organizuar edhe me katër shkollat e tjera”, tha Pozhegu.

Dea Rexha, nxënëse në shkollën “Mazllum Këpuska”, shprehu gëzimin e saj për ndihmën për moshatarët e saj. “Fëmijët janë qenia më e pafajshme në planet dhe të gjithë duhet të kenë kushte të mira për jetesë. Gëzohem që si shkollë jemi organizuar për të dhuruar ndihma”, tha ajo.

Edhe Jon Matoshi, nxënës i klasës së tetë në këtë shkollë, tha se janë të vetëdisjhëm që ndihmat e grumbulluara mund të mos jenë të mjaftueshme, prandaj bëri apel tek të gjithë që të dhurojnë për familjet ën nevojë.

“Si klase jemi organizuar shumë mirë dhe kemi arritur të kemi dy paketa, ne jemi të vetëdijshëm që ndoshta nuk mjaftojnë, por kemi ndihmuar me aq sa kemi pasur mundësi”, tha ai./radiogjakova/