Tash e disa muaj, një pjesë e shtratit të lumit Krena, në njërën anë të urës së Taliqit ka qenë e stërmbushur me mbeturina nga më të ndryshmet, si pasojë e hedhjes nga njerëz të pandërgjegjshëm por edhe si pasojë e terrenit të vështirë për pastrim.

Duke nisur nga e dita e premte, komuna e Gjakovës e përkrahur edhe nga disa kompani private, ka nisur pastrimin e kësaj pjese të lumit, por edhe pjesëve të tjera në këtë zonë, duke krijuar kështu një ambient më të mirë.

Aksioni i pastrimit që është zhvilluar përgjatë kësaj fundjave do të vazhdojë deri ditën e martë.

Komuna e Gjakovës apelon tek banorët e kësaj zone, por edhe tek qytetarët e tjerë të Gjakovës që ta mbrojnë lumin Krena dhe të mos hedhin mbeturina në të.

Në të kundërtën, Komuna zotohet se ditëve në vazhdim do të shtojë inspektimet përgjatë lumit Krena dhe do të gjobisë të gjithë ata që kapen duke hedhur mbeturina në lum./radiogjakova/