Pas telasheve që janë shkaktuar gjatë ditës së hënë në disa zona të qytetit, ku janë vërshuar disa prona të qytetarëve, të martën situata po shkon drejtë normalizimit.

Në Drejtorinë për Mbrojtje dhe Shpëtim njoftuan se lumenjtë po bien në kuotat normale dhe pa rrezik për vërshime të reja.

Si pasojë e shiut të pandërprerë gjatë ditës së hënë, disa prona bri lumenjve janë përmbytur. Situatë më e rëndë ka qenë në rrugën “Ahmet Korenica”, si dhe në “Sadik Stavileci”, ku si pasojë e daljes nga shtrati të lumenjve Krena dhe Lukac, uji ka hyrë në oborre dhe në bodrumet e shtëpive.

Probleme ka pasur edhe në rrugën “Fehmi Agani”, ku është dashur intervenimi në hapjen e një kanali të ujit.

Por, Besim Meqa, udhëheqës i sektorit për Siguri dhe Emergjenca në Kuvendin e Komunës së Gjakovës, tha se situata gjatë ditës së martë është më e qetë dhe po i kthehet normalitetit.

Ndonëse gjatë së hënës është raportuar se probleme me ujin ka pasur edhe në fshatin Rracaj, zyrtari komunal Meqa, tha se nga zonat rurale nuk ka pasur ndonjë ankesë nga ana e qytetarëve për telashe të tilla./radiogjakova/