Pas publikimit të emrave të anëtarëve të Bordeve në tri ndërmarrjet publike në Gjakovë, Lëvizja Vetëvendosje ju ka drejtuar përfaqësuesve të mediave me një reagim të cilën e kanë titulluar “Komuna vazhdon me punësime të militantëve”.

“Pas një kohe mjaft të gjatë, javën e kaluar u përzgjodhën anëtarët e Bordit të Drejtorëve për ndërmarrjet publike “Stacioni i autobusëve”, “Ngrohtorja e qytetit” dhe “Çabrati”, ndërmarrje këto jetike për funksionimin normal të qytetit.

“Duke i ditur problemet dhe keq-menaxhimin në të kaluarën si dhe situatën e rëndë me mbeturinat dhe ngrohjen qendrore të qytetit, një përzgjedhje e pandikuar politikisht dhe profesionale është kërkesa minimale që do të hapte rrugë për një ri-funksionalizim të këtyre ndërmarrjeve.

“Përkundër premtimeve të kësaj qeverisje për transparencë dhe profesionalizëm, edhe në këto konkurse vazhdoi rehatimi i militantëve partiakë, ashtu siç ka ndodhur edhe me konkurset e arsimit, me punëtorët e angazhuar me kontratë mbi vepër, e të tjera. Është dëshpëruese që vendet edhe ashtu të pakta të punës, por shumë të rëndësishme, janë mall në pazaret e koalicionit lokal”, thuhet ndër të tjera në këtë komunikatë./radiogjakova/