Vëllaznimit arriti të marrë një pikë të rëndësishme në ndeshjen ndaj Lirisë në Prizren.

Ekipi gjakovar bëri një paraqitje me dy fytyra, ku në pjesën e parë u prezantua dobët duke pësuar dy gola, por në pjesën e dytë pas zëvendësimeve të trajnerit Munishi, Vëllaznimi arriti të dominojë kundërshtarin dhe të barazojë rezultatin në 2-2.

Me pak fat, kuqezinjtë mund të ktheheshin në Gjakovë me tre pikë, por traversa shpëtoi ekipin prizerenas në çastet e fundit.

Liria shënoi që në minutën e 13 me Meriton Korenicën nga pika e bardhë, ndërsa dyfishoi epërsinë me Artur Maganin në të 29-n.

Me të filluar pjesa e dytë, reagoi Munishi që futi në lojë Osmanollajn, Dushin e Ivanin.

Goli i parë i Vëllaznimi erdhi në minutën e 65 kur nga penalltia ishte i saktë Albutrint Morina, ndërsa tre minuta më vonë barazojnë me Semir Zenelin.

Në fund, Ivani kishte mundësi të mirë shënimi, por traversa i mohoi golin në minutën e 93-të.

Pas kësaj ndeshje, Vëllaznimi shkon në kuotën e 17 pikëve dhe renditet në pozitën e 7. Ndeshjen e ardhshme e luan në Gjakovë ndaj Drenicës./radiogjakova/