Dikush dha një ide, u pëlqye nga miqtë e afërt të cilët e përkrahen, pastaj dhe nga të tjerët dhe u kështu nisi një rrugë për të ndihmuar familjet nevojtare. Një grup të rinjsh, saktësisht nxënës të Gjimnazit “Hajdar Dushi” u bënë shembull pas inciativave të njëpasnjëshme për bamirësi. Nën moton “Ndihmo sot që të gjesh nesër” ata kanë hapur zemren dhe kanë zgjatur doren e ndihmës, por njëkohësisht kanë sensibilizuar shumë të rinj tjerë.

Vonesa Perteshoni vajza që bashkoi të rinjët rrreth kësaj inciative, tregon fillimet e organizimit të tyre. “Duke parë realitetin e hidhur në vendin tim, mendova të krijoj diçka ku shumë vullnetarë të rinj mund të ishin pjesëmarrës. Gjithçka filloi nga zero ku gjeta përkrahjen tek shoqëria më e afërt e pastaj duke u zgjeruar edhe më tej”, thotë Vonesa.

Me një kitarë e duke kënduar disa këngë në qendër të qytetit të Gjakovës këta të rinj kishin nisur aktivitetin e tyre të parë që kishtë synim të mbledhte të holla në ndihmë për një fëmijë që vuante nga leukemia, Debatikun. Ata e arritën atë që donin dhe kjo i shtyu të marrin iniciativa të tjera.

Kishte filluar të ftohej koha, dimri po afronte dhe në kokë ju erdhën ide të tjera që përsëri të shfaqnin anën humane të tyre, kësaj radhe ndihma e tyre do të shkonte për disa familje në nevojë. Tashmë ata nuk ishin “disa”, por u bënë “shumë” veta që donin të bëheshin pjesë e këtij organizimi. Këtu nisi bashkëpunimi dhe me Kryqin e Kuq të Gjakoves.

“Dhamë lajmin në gjithë Gjimnazin për mbledhjen e rrobave të ndryshme të cilat pastaj do t’u dërgoheshin familjeve në nevojë. Ky lajm u prit shumë mirë nga të gjithë nxënësit e kësaj shkolle si dhe nga vet drejtoria e shkollës, nga të cilët kishim edhe mbeshtetjen e plotë”, tregon Amir Kadrija, një nga vullnetarët e rinj që ju bashkua grupit.

Gjimnazistët morën rrobat që ishin të tepërta në dollapet e tyre dërguan në vendin e ckatuar në shkollë dhe kontaktuan Kryqin e Kuq për të bërë shpërndarjen e tyre tek ata që kishin më shumë nevojë.

“Unë duke qenë njëri nga pjesëmarrësit e shumtë në këtë gjest humanitar ndihesha krenar dhe njëkohsisht shumë i lumtur pasi që e dija se gjithë ai mund i yni nuk do të shkonte dëm, por përkundrazi do t’u sillte ngrohtësi qoftë fizike dhe më me rëndësi shpirtrore atyre familjeve të vuajtura e të lëna pas dore”, shprehet Amiri, teksa thotë se nuk përshkruhen lumturia dhe falenderimet e nënave shoqëruara me lotë pasi merrnin ndihmat e dhuruara nga gjimnazistët për fëmijët e tyre.

Se sa të rëndësishme janë këto inciativa tregon edhe Dushe Lama nga Kryqi i Kuq. Ajo vlerëson bashkëpunimin që ka organizata e saj me gjimnazistët e “Hajdar Dushit”.

“Është e rëndëishme iniciativa e nxënësve të gjimnazit “Hajdar Dushi”, ata përveç ndihmës janë bërë dhe vullnetarë dhe antarë të degës së Kryqit Kuq të Gjakovës. Ne i ndihmojmë ata duke i’u dhënë informacionë për familjet skamnore, po ashtu i njoftojmë për punën dhe aktivitetet që kryhen në kuadër të Kryqit të Kuq. Vullnetarët janë krahu i djathtë i joni”, thotë Lama.

Këta të rinj premtojnë se do ketë prap organizime dhe ndihma për nevojtarët që janë në Gjakovë, ndërsa Vonesa ka një ftesë për gjithë nxënësit tjerë në mënyrë që t’u bashkohen.

“Kemi shumë plane për të ardhmen, kështu që ftoj edhe nxënësit tjerë të bashkohen me ne, të vendosin veten në vend të atyre njerëzve që kanë nevojë dhe të ndizet tek ata ndjenja humane, për të cilen gjë edhe jemi dalluar. Ndoshta ndihmat tona nuk janë të kushtushme sa i përket vlerës monetare, por ne dhurojmë me dashuri, dhe gjërat që bëhen më shumë dashuri vlejnë më shumë”, përfundon ajo./radiogjakova/

Eli Bytyqi