Belgjikë- RSC Anderlecht e ka shkarkuar trajnerin John van den Brom pas humbjes së nëntë sezonale dhe e ka zëvendësuar me asistenti i tij, Besnik Hasi.

Humbja e të shtunës (1-0) nga Oud-Heverlee Leuven, e ka lënë kampionin e Belgjikës në pozitën e tretë në tabelë me 12 pikë prapa liderit Standard Liege dhe kjo i ka kushtuar me punë strategut holandez.

“Në këtë moment, fatkeqësisht, nuk ka opsion tjetër pos që ta falënderojmë Van den Bromin për angazhimet e tij në dy sezonet e fundit. Shkarkimi i tij është një shpërndarje e përgjegjësisë nga bordi, trajneri dhe lojtarët”, deklaroi kreu i Anderlechtit, Roger Vanden Stock.

42-vjeçari Hasi e ka prezantuar si lojtar Anderlechtin gjatë viteve 2000-2006. Ish-mesfushori shqiptar që kur e mbylli karrierën në vitin 2008 ka qenë në postin e asistent-trajnerit te klubi belg.

“Besnik Hasi e njeh klubin në tërësi. Ne si bord jemi të bindur se ai ka cilësitë për ta zgjuar këtë skuadër”, ka deklaruar menaxheri gjeneral, Herman Van Holsbeeck. /telegrafi/