Vëllaznimi ka humbur 1-0 sfidën e javës së dytë të Superligës së Kosovës në futboll ndaj Drenicës që u luajt në stadiumin “Bajram Aliu” në Skënderaj.

Taulant Dajaku realizoi golin e vetëm nga pika e bardhë në minutën e 50-të që i sigurojnë Drenicës tri pikët e para në këtë sezon.

Vendasit e nisën më mirë takimin pasi rrezikuan që në minutën e 10 me Enis Zabërgjen, por Muhaxhiri u tregua vendimtar.

Vetëm katër minuta më vonë, shtylla i mohoi golin Dajakut.

Pas këtij rasti, Vëllaznimi filloi të dilte para dhe Egzon Gashi për pak sa nuk shënoi në minutën e 33-të.

Para përfundimit të pjesës së parë, edhe Semir Zeneli kishte një mundësi të artë, por nuk çoi topin në rrjetë nga fare pak metra.

Pesë minuta nga pjesa e dytë akordohet edhe penallti për vendasit, të cilën mundësi e shfrytëzon më së miri Dajaku që shënon për 1-0.

Trajneri Munishi u mundua të ndryshonte në mënyrë loje dhe të gjente golin e barazimit, por kjo gjë nuk ndodhi.

Vëllaznimi mbetet në kuotën e 3 pikëve, ndërsa javën e ardhshme pret në Gjakovë Vllazninë e Pozharanit./radiogjakova/