U mendua se do të jetë si një ndeshje miqësore duke pasur parasysh se Liburni kishte vendosur fatin e grupit B, por ndeshja e fundit e fazës parakualifikuese e këtij grupi mes ekipit vendas Differdange dhe gjakovarëve rezultoi shumë emocionuese dhe rivalitet të madh sportiv.

Vendasit kërkonin ta mbyllnin me fitore, por Liburni këmbëngulte për fitoren e tretë në po aq ndeshje. Gjakovarët ia dolën, pasi në fund triumfuan 6-2.

Edhe njëherë tjetër shkëlqeu Halim Selmanaj që shënoi tre gola, ndërsa me nga një kontribuan edhe Ideal Brovina, Valon Kasapi dhe Arbër Dobroshi.

Nuk mungoi as atmosfera në sallë, me bashkatdhetarët që i qëndruan krah Liburnit në çdo ndeshje duke i dhënë zemër të gjithë lojtarëve kuqezi.

Edhe gjyqtarët kishin më tepër punë, duke dhënë edhe dy të kuq për vendasit, të cilët ashpërsuan lojën e tyre me kalimin e minutave.

Por, në fund, të gjitha dritat janë mbi Liburnin, me 3 fitore, 9 pikë të tubuara dhe 20 gola të shënuar. Të jashtëzakonshëm!./radiogjakova/