Vëllaznimi nuk arriti më shumë se një barazim pa gola ndaj Ferronikelit në ndeshjen e javës së pestë të Superligës së Kosovës në futboll.

Kuqezinjtë dominuan ndeshjen dhe krijuan raste më të mira shënimi, por portieri mik Faton Maloku arriti të mbajë portën e pa prekur dhe t’i japë një pikë skuadrës së tij.

Talenti Nikson Memaj ishte ai që rrezikoi i pari për vendasit, por Maloku u tregua i vëmendshëm. Deri në fund të pjesës së parë tentoi edhe Bardhoku, por mbrojtja u kujdes të largonte topin në kohë.

Pjesa e dytë foli totalisht në të mirë të Vëllaznimit, edhe pse miqtë kishin rastin e parë me Hotin, por që Muhaxheri ishte në vend.

Në minutën e 51, Egzon Gashi kishte mundësi të shënonte, por Maloku tregohet vendimtar. Dhjetë minuta më vonë, tentoi Milicaj për Ferronikelin, por gjuajtje e tij përfundon jashtë kuadratit të portës.

Braziliani Oliviera tentoi me kokë, por nuk ia doli, ndërsa Maloku tregoi se ishte dita e tij kur i mohoi golin Memajt në minutën e 80.

Deri në fund, Sahiti kishte mundësinë më të mirë nga goditja e dënimit, por gjuajtja e tij e plogësht nuk ndryshoi rezultatin.

Javën e ardhshme, Vëllaznimi luan me Llapin në Podujevë./radiogjakova/