Pas vendimit të Komunës së Gjakovës për të ndarë 70 mijë euro për klubet dhe shoqatat sportive të kësaj komune, të pakënaqur me këtë ndarje kanë mbetur ekipet e femrave, anëtare të superligave të Kosovës në hendboll dhe basketboll, nisur nga fakti se të tri klubeve bashkë u janë ndarë 8 mijë euro.

Nisur nga vështirësitë e mëdha materiale, KH Vëllaznimi, ka paralajmëruar mundësinë e mosvazhdimit të garave në Superligë. Menaxheri i këtij klubi, Denis Spahia, për Radio Gjakovën ka thënë se gjatë ditëve në vazhdim, do të ulet kryesia e klubit për të vendosur se çfarë do të bëjë për vazhdimin e garave, nisur edhe nga borxhet e mëdha që ka ky klub.

I pakënaqur me ndarjen e subvencioneve është shprehur edhe sekretari i KH Shqiponja Demë Sadiku, i cili një veprim të tillë e ka quajtur si një padrejtësi të madhe ndaj sportit femëror. Ndryshe, si kemi njoftuar tashmë, nga shuma e gjithëmbarshme prej 70 mijë euro të parapara për subvencionimin e klubeve sportive, komuna e Gjakovës, 15 mijë euro ia ka dedikuar klubit të futbollit Vëllaznimi, kurse klubeve simotra në basketboll dhe hendboll në konkurrencën e meshkujve nga 10 mijë euro./radiogjakova/