Florid Gashi dhe Shkëlzen Goqi janë kampionët e rinj të kërcimeve nga Ura e Fshejtë në stilin dallëndyshe.

Juria e përbërë nga Kujtim Gorani, Gonxhe Xhiha-Basha dhe Sokol Hoti vlerësoi me pikë të barabarta 58.5 të dy garuesit, duke bërë që ata të ndajnë pozitën e parë. Ndërsa vendin e tretë në këtë kategori u radhit ish-kampioni Ludovik Prenqi.

Në një garë emocionuese, fituesit vendosën që vlerën monetare që vjen bashkë me çmimet t’ia dhurojnë familjes së të ndjerit Sali Gërqina.

Edhe në kërcimet në këmbë kishte dy fitues. Kreshnik Bejra dhe Egzon Prenqi u vlerësuan me nga 60 pikë, ndërsa në vendin e tretë u radhit Ardit Bejra.

Edicioni i 67 i kërcimeve nga Ura e Fshejtë iu dedikua legjendave të këtij sporti Ali Podrimës, Besim Mulliqit dhe Sali Gërqinës. Që të tre u nderuan me mirënjohje in memoriam, ndërsa ky i fundit edhe me një minutë duartrokitje pasi javë më parë humbi jetën gjatë përgatitjeve për garën e së dielës.

Me mirënjohje u nderuan edhe persona që kanë mbështetur ndër vite garën e kërcimeve nga Ura e Fshejtë.

Ndërsa, Posta e Kosovës prezantoi pullën postare që i dedikohet kësaj gare./radiogjakova/