Kryeministri i Kosovës, Isa Mustafa, ka thënë se Gjakova meriton vëmendje më të madhe të qeverisë qendrore, pasi kontributi i saj në çlirimin dhe shtet ndërtimin e Kosovës është i pamohueshëm.

Këtë deklaratë Mustafa e ka bërë të dielen me rastin e 27-vjetorit të themelimit të degës së Lidhjes Demokratike të Kosovës në Gjakovë. Ai para qindra simpatizantëve në Gjakovë, ka premtuar se do të angazhohet në zgjidhjen e statusit të atyre ndërmarrjeve të Gjakovës që këtë ende nuk e kanë bërë, me qëllim që të gjenerojmë zhvillim dhe punësim për qytetarët e Gjakovës.

Po ashtu, ai u zotua se do të punojë në funksionalizimin e aeroportit të Gjakovës që sipas tij, do të bëhet një aset që do të ketë lakmi jo vetëm Gjakova, por e gjithë Kosova.

Në këtë përvjetor është shpalosur një histori e tërë e pasur e veprave dhe veprimtarëve të Lidhjes Demokratike të Kosovës.

Kryetari i degës Luan Gola ka kujtuar orët e para të datës 14 prill 1990, ku në sallën e sporteve “Shani Nushi” ishte vënë themeli i Lidhjes Demokratike të Kosovës në Gjakovë.

Më pas ai foli për kontributin e anëtarëve të kësaj partie në Gjakovë, si Urim Rexha, Bardhyl Çaushi, Mark Malota dhe Gjergj Sokoli të cilët që nga ditët e para mbi supe mbajtën barrën dhe përgjegjësinë e organizimit dhe udhëheqjes së degës, por edhe që u sakrifikuan për lirinë e vendit.

Me rastin e këtij përvjetori, LDK ka nderuar me mirënjohje Post Mortum familjet e aktivistëve, Sadri Zenelaj, Sahit Mula, Sylejman Sylejmani, Aziz Lila, Beqir Gola dhe Bajram Bardhi. Ndërkohë që ka ndarë mirënjohje edhe për 24 aktivistët e kësaj dege.

Po ashtu me rastin e 27 vjetorit të themelimit të degës në Gjakovë këtij subjekti ju bashkëngjiten 68 të rinj dhe të reja të cilëve kryetari i LDK-së njëherit kryeministri i Kosovë, Isa Mustafa, bashkë me kryetarin e degës, Luan Gola, ju ndanë librezat e anëtarësisë.