Rrjeti rotarian gjithandej botës është mjaft aktiv ndërkohë që Klubi Rotarian Gjakova, ka nisur rrugëtimin në mbështetje të komunitetit që në Qershor të vitit 2000 duke shënuar themelimin e klubit të parë në Kosovë. Pikërisht ky klub gjakovar është promotor edhe i bashkëpunimeve të reja. Mbrëmë ka organizuar ceremoninë e binjakëzimit me klubet rotariane, Dardania të Prishtinës, klubin rotarian të Tetovës dhe Klubin Rotarian Keystone Distrikti 70280.

Blendi Bardhi kryetar i klubit Rotarian Gjakova me këtë rast ka përmendur arritjet e këtij klubi në mbështetje të komunitetit në Gjakovë dhe komunat përreth me pajisje shëndetësore për institucionet shëndetësore, me kompjuterë për nxënësit e shkollave, pajisje për zjarrfikësit e regjionit e të tjera ndihma. Pasi është nënshkruar solemnisht akti i binjakëzimit, kryetarja e komunës Mimoza Kusari-Lila ka përgëzuar rotarianët për aktivitetet e zhvilluara ndërsa ka uruar një bashkëpunim të mirëfilltë mes klubeve të binjakëzuara. Ndërkaq, themeluesi i Rotarit në Kosovë, Ruzhdi Bakalli përmes linjes direkte nga SHBA-të, ka shprehë urimet e sinqerta për këtë binjakëzim të katër klubeve të cilin e konsideroj si një nga ngjarjet e rralla në aktivitetet e rotarianëve. Ai duke i përshendetur rotarianët prezentë theksoj se ky binjakëzim është një motiv që klubet rotariane të bashkpunojnë mes tyre në shërbim të komunitetit.

Solemnitetin e binjakëzimit e ka shoqëruar diskutimi për idetë dhe format konkrete të bashkëpunimit për të cilat folën drejtuesit e klubeve mike, Mazllum Belegu nga Dardania Prishtinë, Argjent Imeri nga Tetova dhe Hektor Binishi nga Klubi më i ri Rotarian Keystone.