Gjakovë- Në atmosferë të gëzuar dhe festive bashkëqytetarët e besimit islam, po kremtojnë Kurban Bajramin. Që në orët e hershme të mëngjesit mijëra besimtarë i janë drejtuar xhamive për të bërë faljen e Bajramit të vogël.

Manifestimi qendror i faljes së namazit është bërë në xhaminë e Hadumit, i prirë nga Hafiz Safet Hoxha, i cili përmes një ligjërate përcolli edhe mesazhin për Kurban Bajramin.

Manifestimet kanë vazhduar me vizitat tradicionale në varrezat e qytetit për të afërmit e ndjerë, ndërsa në ambientet e Këshillit të Bashkësisë Islame të Gjakovës u organizua pritje për mysafirë dhe vizitorë.

Me ndjenjën e solidaritetit dhe të bamirësisë, individ, organizata, shoqata dhe ndërmarrje tregtare, për të varfëritë dhe familjet në nevojë kanë shpërndarë mish të kurbanëve dhe ndihma në artikuj ushqimorë.

Ndryshe, festa e Bajramit të vogël po vazhdon me vizitat e ndërsjella familjare tek të afërmit, miqtë e shokët dhe me gostinë e bakllavës tradicionale dhe ëmbëlsirave nga më të ndryshmet./radiogjakova/